नवी दिल्ली/मुंबई | प्रतिनिधी
खासगी हवामान संस्था स्कायमेटच्या अहवालानुसार, नैऋत्य मोसमी वारे (मान्सून) केरळच्या जवळपास दाखल झाल्यानंतर आता ते उत्तर दिशेने सरकण्यास अनुकूल स्थिती निर्माण झाली आहे. पुढील ४८ ते ७२ तासांत मान्सून कर्नाटकच्या किनारी भागात धडक देण्याची दाट शक्यता वर्तवण्यात आली आहे.
दुसरीकडे, भारतीय हवामान शास्त्र विभाग (आयाएमडी), तसेच मुंबई व पुणे प्रादेशिक हवामान केंद्र (आरएमसी) यांनी दिलेल्या अद्ययावत माहितीनुसार, मान्सून अत्यंत वेगाने आणि अनुकूल परिस्थितीमध्ये पुढे सरकत आहे. रविवारी सायंकाळपर्यंत मान्सूनने दक्षिण अरबी समुद्राचा आणखी काही भाग, संपूर्ण मालदीव, लक्षद्वीपचा परिसर आणि केरळच्या बहुतांश भागांत आपली पकड मजबूत केली आहे. हवामान विभागाच्या अधिकृत बुलेटिननुसार, अरबी समुद्रातील वातावरणीय प्रणाली आणि चक्रीवादळासारखी स्थिती मान्सूनच्या प्रगतीला गती देत आहे. त्यामुळे, मोसमी वारे मुख्य भूमीवर वेगाने सक्रिय होत आहेत.
सुरुवातीच्या टप्प्यात सरासरीपेक्षा जास्त पाऊस
खाजगी हवामान संस्था ‘स्कायमेट’ आणि ‘ॲक्युवेदर’ यांच्या प्राथमिक अंदाजानुसार, यंदा दक्षिण आणि मध्य भारतामध्ये मान्सूनच्या सुरुवातीच्या टप्प्यात सरासरीपेक्षा जास्त पाऊस पडण्याची शक्यता आहे. पश्चिमी विक्षोभ (वेस्टर्न डिस्टर्बन्सेस) आणि बंगालच्या उपसागरातील हवेच्या कमी दाबाच्या पट्ट्यामुळे मोसमी वाऱ्यांचा प्रवाह अधिक बळकट झाला आहे.
राज्यात पूर्व-मोसमी पावसाचा जोर
मुंबई आणि पुणे प्रादेशिक हवामान केंद्राने महाराष्ट्र संदर्भात जारी केलेल्या विशेष पत्रकानुसार, राज्यातील पूर्व-मोसमी पावसाचा जोर लक्षणीयरीत्या वाढला आहे. मुंबई, ठाणे, कोकण किनारपट्टी तसेच पुणे आणि कोल्हापूरसह पश्चिम महाराष्ट्रात रविवारी सायंकाळपासूनच पावसाने हजेरी लावली आहे. प्रादेशिक केंद्राच्या वरिष्ठ अधिकाऱ्यांनी दिलेल्या माहितीनुसार, मान्सूनची सध्याची गती पाहता, येत्या ७ ते ९ जून दरम्यान मोसमी वारे दक्षिण कोकणातून महाराष्ट्रात प्रवेश करण्याची शक्यता आहे. हवामान खात्याने स्थानिक प्रशासन आणि शेतकऱ्यांना हवामानातील या बदलांवर बारीक लक्ष ठेवण्याचे आणि सतर्क राहण्याचे आवाहन केले आहे.
तुम्हाला हे वाचायला नक्की आवडेल
