बंगालच्या उपसागरावर पुन्हा नव्या प्रणालीची चाहूल
चक्रीवादळ बनल्यास दिले जाणार भारताने सुचवलेले 'मुरसू' हे नाव
मुंबई : अर्णब चक्रीवादळानंतर अवघ्या चार दिवसांत बंगालच्या उपसागरात पुन्हा एकदा हवामान प्रणाली जोर धरत आहे. भारताच्या INSAT-3DS हवामान उपग्रहाने शनिवारी, ३१ ऑक्टोबर रोजी सकाळी टिपलेल्या छायाचित्रांमध्ये आग्नेय बंगालच्या उपसागरावर आणि अंदमान-निकोबार बेटांच्या लगतच्या भागावर एक संघटित ढगप्रणाली विकसित होत असल्याचे स्पष्ट दिसत आहे.
भारतीय हवामान विभाग (आयएमडी)ने शनिवारी दुपारी जारी केलेल्या विशेष पत्रकानुसार, दक्षिण अंदमान समुद्रावर तयार झालेले कमी दाबाचे क्षेत्र आता तीव्र होऊन आग्नेय बंगालच्या उपसागरावर सुस्थित कमी दाबाचे क्षेत्र बनले आहे. सकाळी साडे अकरा वाजता त्याचे रूपांतर डिप्रेशनमध्ये झाले असून, ते श्री विजयपुरमपासून 330 किमी नैऋत्येला होते. पुढील 12 तासात त्याचे डीप डिप्रेशनमध्ये आणि त्यानंतरच्या 12 तासात चक्रीवादळात रूपांतर होण्याची दाट शक्यता आहे. जर ते चक्रीवादळ बनले तर भारताने सुचवलेले ‘मुरसू’ हे नाव त्याला दिले जाईल.
View this post on Instagram
ही प्रणाली पश्चिम-वायव्य दिशेने सरकत असून 2 नोव्हेंबरच्या संध्याकाळपर्यंत आंध्र प्रदेश किनारपट्टीजवळील पश्चिम-मध्य बंगालच्या उपसागरात पोहोचेल आणि 3 नोव्हेंबरच्या सकाळी किनारपट्टी ओलांडण्याचा अंदाज आहे. आयएमडीचे महासंचालक मृत्युंजय महापात्रा यांनी सांगितले की, यावेळी वाऱ्याचा वेग 80 ते 90 किमी प्रतितास असून, काही ठिकाणी 100 किमी पर्यंत झोत वाहतील. हे वादळ 28 ऑक्टोबर रोजी 150 किमी वेगाने धडकलेल्या अर्णब चक्रीवादळापेक्षा कमकुवत असेल.
या प्रणालीमुळे तामिळनाडू, पुद्दुचेरी आणि कराईकलमध्ये 5 नोव्हेंबरपर्यंत, तर केरळ आणि माहेमध्ये 4 नोव्हेंबरपर्यंत मुसळधार पावसाचा इशारा देण्यात आला आहे. अंदमान समुद्रात सध्या समुद्र खवळलेला असून मच्छिमारांना खोल समुद्रात न जाण्याचा सल्ला देण्यात आला आहे. सध्या पश्चिम बंगालसाठी कोणताही इशारा नसल्याचे आयएमडीने स्पष्ट केले आहे.
तुम्हाला हेही वाचायला नक्की आवडेल.
