जळगाव :- छत्रपती संभाजीनगर येथे पार पडलेल्या महाराष्ट्र, गुजरात व गोवा या तीन राज्यातील कृषी विज्ञान केंद्रांच्या दोन दिवसीय कार्यशाळेत रावेर तालुक्यातील पाल येथील कृषी विज्ञान केंद्रास उत्कृष्ठ सादरीकरण पुरस्काराने सन्मानित करण्यात आले.
नवी दिल्ली येथील आयसीएआर अर्थात भारतीय कृषी अनुसंधान परिषद अंतर्गत पुणे येथील कृषी तंत्रज्ञान उपयोजन संशोधन संस्था (अटारी) व परभणी येथील वसंतराव नाईक मराठवाडा कृषी विद्यापीठ यांच्या संयुक्त विद्यमाने 28 ते 30 जुलै दरम्यान या कार्यशाळेचे आयोजन करण्यात आले होते. कार्यशाळेत महाराष्ट्र, गुजरात व गोवा राज्यातील कृषी विज्ञान केंद्रांसह 82 वरिष्ठ शास्त्रज्ञ, प्रमुख तसेच देशातील नामवंत कृषी विद्यापीठातील कुलगुरूंनी सहभाग नोंदविला होता.
कार्यशाळेत सातपुडा विकास मंडळ संचालित कृषी विज्ञान केंद्राचे प्र.वरिष्ठ शास्त्रज्ञ व प्रमुख प्रा.महेश महाजन यांनी केव्हीकेच्या माध्यमातून 2022-23 या वर्षातील विविध माध्यमांचा वापर करून नवीन तंत्रज्ञानाचा प्रसार, पिक प्रात्यक्षिके, शेती चाचण्या, विस्तार उपक्रम इत्यादी विषयी सादरीकरण केले. कृषी विज्ञान केंद्र शेतकर्यांना विविध बाबीवर मार्गदर्शनसाठी राबविलेले विविध उपक्रम, कार्यक्रम तसेख केलेल्या प्रशंसनीय कार्याची दाखल घेवून वसंतराव नाईक मराठवाडा कृषी विद्यापीठाचे कुलगुरू डॉ. इंद्रमणी यांच्या हस्ते व बिकानेर येथील सीआयएएचचे डॉ. जगदीश राणे, अटारीचे माजी संचालक डॉ. लाखन सिंग, वसंतराव नाईक मराठवाडा कृषी विद्यापीठचे संचालक डॉ. डी. बी. देवसरकर यांच्या उपस्थितीत कृषी विज्ञान केंद्राला उत्कृष्ठ सादरीकरण पुरस्काराने सन्मानित करण्यात आले. विज्ञान केंद्राचे प्र. वरिष्ठ शास्त्रज्ञ व प्रमुख प्रा.महेश महाजन यांनी हा पुरस्कार स्विकारला.
तणांच्या नियंत्रणासाठी कृषीसम्राटचे ग्लायकिल… | Glykill |
याप्रसंगी बंगलोर येथील अटारीचे माजी संचालक डॉ. यु. एस. गौतम, कृषी विस्तारचे माजी उप महासंचालक डॉ. किरण कोकाटे, अकोला येथील पंजाबराव देशमुख कृषी विद्यापीठचे कुलगुरू डॉ. शरद गडाख, नवसारी कृषी विद्यापीठचे कुलगुरू डॉ. झेड. पी. पटेल, इंफाळ येथील केंद्रीय कृषी विद्यापीठचे कुलगुरू डॉ. अनुप मिश्रा, पुणे येथील अटारीचे संचालक डॉ. एस. के. रॉय, पंजाबराव देशमुख कृषी विद्यापीठचे संचालक डॉ.धनराज उंदिरवाडे, डॉ. उमेश चीन्चमलातुरे व डॉ.किशोर झाडे आदी उपस्थित होते. कृषी विज्ञान केंद्राला पुरस्काराने सन्मानित करण्यात आल्याबद्दल संस्थेचे अध्यक्ष आ. शिरीष चौधरी, सातपुडा विकास मंडळाचे सचिव अजित पाटील व संचालक मंडळाने अभिनंदन केले आहे.
पुरस्कार म्हणजे कृषी सेवेशी असलेल्या बांधिलकीचे प्रतिक
कृषी विज्ञान केंद्राच्या माध्यमातून राबविले जाणारे उपक्रम शेतकर्यांच्या हिताचे असून केव्हीकेला मिळालेला पुरस्कार कृषी सेवेशी असलेली बांधीलकी आणि शेतकरी समाजाला सक्षम बनविण्याचे प्रतिक आहे. यातून कार्याचा दर्जा सुधारल्याचे दिसून येते. उल्लेखनीय कामगीरी बद्दल केंद्रातील शास्त्रज्ञ व कर्मचारी यांचे अभिनंदन. कृषी क्षेत्राच्या वाढीसाठी आणि समृद्धीसाठी केव्हीकेने सतत प्रयत्नशील राहावे, या शुभेच्छा.
– आ. शिरीष मधुकराव चौधरी,
अध्यक्ष, सातपुडा विकास मंडळ, पाल
