मुंबई: उद्याच्या मंत्रिमंडळ बैठकीत शेतकऱ्यांना दिलासादायक निर्णय घेतला जाण्याची शक्यता
सध्या गणपती काळात काही ठिकाणी पाऊस परतलेला असला तरी, राज्यातील 18 जिल्ह्यांवर दुष्काळाचे मोठे संकट घोंघावत असून, बळीराजा पुन्हा एकदा अडचणीत सापडला आहे. या गंभीर परिस्थितीची दखल घेत राज्याचे महसूलमंत्री चंद्रशेखर बावनकुळे यांनी संबंधित जिल्हाधिकाऱ्यांसोबत नुकतीच व्हिडिओ कॉन्फरन्सिंगद्वारे तातडीची आढावा बैठक घेतली. या बैठकीत त्यांनी प्रशासनाला पिकांचे झालेले नुकसान आणि संभाव्य चाराटंचाई याबाबतचा सविस्तर अहवाल सोमवारपर्यंत सादर करण्याचे कडक निर्देश दिले आहेत. या अहवालाच्या आधारावरच आगामी मंगळवारच्या राज्य मंत्रिमंडळ बैठकीत दुष्काळग्रस्त शेतकऱ्यांना दिलासा देण्यासाठी मोठा आणि महत्त्वपूर्ण निर्णय घेतला जाण्याची दाट शक्यता आहे.
नुकसानीचे केवळ अंदाजे किंवा ढोबळमानाने मूल्यांकन न करता, अचूक आकडेवारी मिळवण्यासाठी प्रशासनाने आधुनिक तंत्रज्ञानाचा वापर करण्याचे ठरवले आहे. यासाठी उपग्रह छायाचित्रे (सॅटेलाईट इमेजेस) आणि डिजिटल प्रतिमांच्या माध्यमातून पिकांच्या नुकसानीची काटेकोर पाहणी केली जात आहे. अत्याधुनिक तंत्रज्ञानाच्या आधारे तयार करण्यात आलेला हा अहवाल आणि स्थानिक लोकप्रतिनिधींनी केलेल्या सूचना यांची सांगड घालून, मंगळवारच्या मंत्रिमंडळ बैठकीत दुष्काळ निवारणासाठी प्रभावी तसेच दीर्घकालीन उपाययोजनांची ठोस रूपरेषा निश्चित केली जाईल, असा विश्वास महसूलमंत्र्यांनी व्यक्त केला आहे.
मराठवाडा, विदर्भाला सर्वाधिक फटका
दुष्काळसदृश परिस्थितीचा सर्वाधिक फटका मराठवाडा आणि विदर्भातील शेतीला बसला आहे. या भागातील कापूस, सोयाबीन, तूर, मूग, उडीद आणि हळद यांसारख्या प्रमुख खरीप पिकांचे मोठ्या प्रमाणावर नुकसान झाले आहे. याशिवाय, सततच्या ढगाळ वातावरणामुळे नागपूर आणि अमरावती पट्ट्यात संत्रा बागांवर बुरशीजन्य रोगांचा प्रादुर्भाव वाढला आहे. पिकांच्या नुकसानीसोबतच धाराशिव, बीड आणि जालना या जिल्ह्यांमध्ये जनावरांच्या चाऱ्याची तीव्र टंचाई निर्माण झाली असून, जर यंदाचा उसाचा गळीत हंगाम लवकर सुरू झाला, तर ही चाराटंचाई अधिकच उग्र रूप धारण करू शकते अशी भीती व्यक्त केली जात आहे.
अहिल्यानगर, नंदुरबारमध्ये परिस्थिती भीषण
सध्या अहिल्यानगर, सोलापूर, छत्रपती संभाजीनगर, जालना, धाराशिव, बीड, लातूर, नांदेड, परभणी, हिंगोली, वाशीम, अकोला, अमरावती, यवतमाळ, वर्धा, नागपूर, चंद्रपूर आणि नंदुरबार या 18 जिल्ह्यांमध्ये ही दुष्काळसदृश स्थिती निर्माण झाली आहे. विशेषतः सोलापूर आणि नंदुरबार जिल्ह्यांत पावसाअभावी पेरण्याच न झाल्यामुळे, तसेच कांदा लागवडीचे प्रमाण लक्षणीयरीत्या घटल्यामुळे हे संकट अधिक गडद झाले आहे. प्रशासनाकडून सर्वेक्षणाचे काम वेगाने सुरू असल्याने आता संपूर्ण राज्याचे लक्ष मंगळवारी होणाऱ्या मंत्रिमंडळाच्या बैठकीकडे लागले असून, सरकार शेतकऱ्यांच्या पदरात नेमकी कोणती मदत टाकणार हे पाहणे महत्त्वाचे ठरणार आहे.
- तुम्हाला हे वाचायला नक्की आवडेल
जागतिक श्रीमंतांच्या यादीत शेती, अन्न व कृषी उद्योजकांचे दिग्गज! - जळगावसह खान्देशात आज पावसाची दाट शक्यता
