आखाजीला येणारा हापूस यंदा दिवाळीलाच बाजारात
नोव्हेंबरमध्येच हापूसची हजेरी; रत्नागिरीचा आंबा वाशी मार्केटमध्ये
आंब्याचा हंगाम म्हटला की एप्रिल-मे महिना डोळ्यासमोर येतो. पण यावर्षी निसर्गाने गणितच बदलले आहे. नोव्हेंबर महिना अर्धा संपत नाही तोच रत्नागिरी जिल्ह्यातील हापूस आंबा थेट मुंबईच्या वाशी मार्केटमध्ये दाखल झाला आहे. हंगामाच्या तब्बल 4 महिने आधीच आलेला हा हापूस सध्या बाजारात कुतूहलाचा आणि चर्चेचा विषय ठरला आहे.
रत्नागिरीतील बागायतदारांनी हिवाळी हंगामातच मोहर येऊन फळधारणा झालेल्या काही बागांमधील निवडक आंबे बाजारात पाठवले आहेत. वाशी एपीएमसी फळ बाजारात या आंब्याच्या मोजक्याच पेट्या आल्या असून व्यापाऱ्यांमध्ये त्याला प्रचंड मागणी असल्याचे सांगण्यात येत आहे.
View this post on Instagram
51 हजारांचा अंदाज का?
वाशी मार्केटमध्ये सध्या आलेल्या हापूसच्या पेटीमध्ये 6 डझन म्हणजे 72 आंबे आहेत. आकाराने मोठे, नैसर्गिकरित्या पिकलेले आणि सुवासिक असलेले हे आंबे सुरुवातीच्या हंगामातील ‘स्पेशल’ म्हणून ओळखले जातात. दरवर्षी फेब्रुवारी-मार्चमध्ये पहिल्या पेटीचा लिलाव होतो, तेव्हा एखाद्या पेटीला 25 हजार ते 50 हजारांपर्यंत बोली लागल्याचा इतिहास आहे. त्याच धर्तीवर यंदा नोव्हेंबरमध्येच आलेल्या या पेटीला तब्बल 51,000 रुपयांपर्यंत दर मिळेल, असा अंदाज व्यापाऱ्यांनी व्यक्त केला आहे.
म्हणजेच एक डझन हापूस सुमारे 8,500 रुपये आणि एक आंबा सुमारे 700 रुपयांपेक्षा जास्त. सामान्य ग्राहकासाठी ही किंमत आवाक्याबाहेरची असली, तरी हॉटेल, निर्यातदार आणि हौशी खवय्यांसाठी हा आंबा म्हणजे स्टेटस सिम्बॉल ठरत आहे.
शेतकऱ्यांसाठी आशादायक की चिंताजनक?
एकीकडे लवकर आलेला हापूस शेतकऱ्यांना चांगला भाव मिळवून देणारा ठरतोय. दुसरीकडे, नोव्हेंबरमध्ये मोहर येणे म्हणजे हवामान बदलाचे लक्षण असल्याचे तज्ज्ञ सांगतात. गेल्या दोन वर्षांपासून कोकणात अवकाळी पाऊस, ढगाळ वातावरण आणि तापमानातील चढ-उतारामुळे आंबा मोहराचे चक्र बिघडले आहे. त्यामुळे एप्रिल-मेमधील मुख्य हंगामावर याचा परिणाम होईल का, याची भीती बागायतदारांना आहे.
रत्नागिरी कृषी विभागाच्या अधिकाऱ्यांच्या मते, ज्या बागांमध्ये पाणी व्यवस्थापन चांगले आहे, जुन्या झाडांना वेळेत खत-पाणी मिळाले, तिथे लवकर मोहर आला आहे. अशा बागांमधील मोजकाच आंबा सध्या बाजारात येत आहे. मोठ्या प्रमाणावर आवक अजून फेब्रुवारीनंतरच होईल.
वाशी मार्केटमध्ये उत्साह
वाशी एपीएमसीमध्ये सध्या इतर फळांची आवक सुरू असताना हापूसच्या पेट्या पाहून व्यापाऱ्यांनीही आश्चर्य व्यक्त केले. “नोव्हेंबरमध्ये हापूस पाहणे म्हणजे दिवाळीत आंबा खाण्यासारखे आहे,” अशी प्रतिक्रिया एका व्यापाऱ्याने दिली.
एकूणच, नोव्हेंबरमधील हापूसने यंदाचा हंगाम लवकर आणि वेगळा असणार याचे संकेत दिले आहेत. आता सर्वांचे लक्ष फेब्रुवारीतील मुख्य हंगामाकडे लागले आहे – तेव्हा दर सामान्य होतील का, की हापूस पुन्हा एकदा सर्वसामान्यांच्या आवाक्याबाहेर जाईल, हे पाहणे महत्त्वाचे ठरेल.
तुम्हाला हेही वाचायला नक्की आवडेल.
