शेती कठोर परिश्रम आणि झोकून देऊन केली तर यश निश्चित आहे. आजच्या युगात शेतकरी शेतीतून प्रसिद्धी आणि संपत्ती दोन्ही कमावत आहेत. समाजात त्यांची वेगळी ओळख तर निर्माण होत आहेच, शिवाय शेतकरी अनेकांसाठी प्रेरणास्रोतही बनत आहे. गुजरातमधील एका शेतकऱ्याचीही अशीच कहाणी आहे. गुजरातमधील पाटण जिल्ह्यातील एका छोट्याशा गावात राहणाऱ्या धीरेंद्र सोलंकी यांनी एक अनोखा व्यवसाय सुरू केला आहे. त्यांनी केलेल्या या व्यवसायाची देशभरात चर्चा होत आहे. धीरेन सोलंकी यांनी त्यांच्या गावात 42 गाढवांसह गाढवाचे फार्म तयार केले असून त्यातून त्यांना महिन्याला 2 ते 3 लाख रुपये उत्पन्न मिळत आहे.
धीरेन सोलंकी अनेक वर्षांपासून सरकारी नोकरीच्या शोधात होते. पण त्यांना योग्य नोकरी मिळत नव्हती. त्यानंतर धीरेन यांना एका खाजगी कंपनीत नोकरी लागली. पण, कुटुंबाचा खर्च भागवणे धीरेन यांना कठीण होत होते. अशातच त्यांना दक्षिण भारतात गाढव पालनाचा व्यवसाय यशस्वीरित्या चालवणाऱ्या काही लोकांबद्दल माहिती मिळाली. त्यांनी या लोकांशी संपर्क साधला आणि गाढव पालनाचा व्यवसाय सुरू करण्याचा निर्णय घेतला. गाढवांचे पालन कसे करावे, त्यांच्या दुधाला बाजारपेठेत कसे मिळवावे याची त्यांना माहिती नव्हती. पण हळूहळू त्यांनी या व्यवसायाची संपूर्ण माहिती घेतली आणि आज ते यशस्वीरित्या गाढव पालन करत आहेत.
धीरेन सोलंकी यांनी सुमारे 8 महिन्यांपूर्वी गावात गाढव फार्म सुरू केले. त्यांनी 20 गाढवांसह हे फार्म सुरू केले, ज्यासाठी त्यांना 22 लाख रुपये खर्च आला. गाढव फार्म सुरु करताना धीरेन सोलंकी यांना अनेक अडचणींना सामोरे जावे लागले. गुजरातमध्ये गाढवाच्या दुधाला कमी मागणी होती, त्यामुळे उत्पन्न मिळत नव्हते. यानंतर धीरेन यांनी दक्षिण भारतातील अशा कंपन्यांशी चर्चा केली की ज्यांना गाढवीच्या दुधाची गरज होती. आज धीरेन कर्नाटक आणि केरळला गाढवाचे दूध पुरवत आहेत. याशिवाय गाढवाच्या दुधाचा वापर करणाऱ्या काही कॉस्मेटिक उत्पादक कंपन्यांनाही दूध ते दूध पुरवत आहेत.
दुधाला प्रति लिटर 5 ते 7 हजार रुपये
गाढवाच्या दुधाचा दर प्रतिलिटर 5 हजार ते 7 हजार रुपये आहे. तर गायीचे दूध ६५ रुपये प्रतिलिटर दराने विकले जाते. गाढवाचे दूध ताजे राहण्यासाठी फ्रीझरमध्ये ठेवले जाते आणि पावडरच्या स्वरूपातही विकले जाते, ज्याची किंमत सुमारे 1 लाख रुपये प्रति किलो आहे, असे धीरेन सांगतात. सध्या त्यांच्या शेतात 42 गाढवे असून आतापर्यंत त्यांनी 38 लाख रुपयांची गुंतवणूक केली आहे. ते म्हणाले की, आतापर्यंत राज्य सरकारकडून कोणतीही मदत मिळालेली नाही, परंतु लवकरच या क्षेत्राला पाठिंबा आणि मान्यता मिळेल, असा आशावाद धीरेन सोलंकी यांनी व्यक्त केला.
गाढवाच्या दुधाचे काय आहेत फायदे?
गाढवाच्या दुधाला प्राचीन काळापासून औषधी गुणांसाठी ओळखले जाते. ग्रीस आणि इजिप्तच्या संस्कृतींमध्ये याचा मोठ्या प्रमाणावर वापर केला गेला. गाढवाचे दूध हा मुलांसाठी चांगला पर्याय मानला जातो, कारण त्याचे दूध मानवी दुधासारखे असते. अनेक अभ्यासातून असे दिसून आले आहे की, गाढवाचे दूध आतड्यांसंबंधी मायक्रोफ्लोरा नियंत्रित करते. रोगप्रतिकारक शक्ती मजबूत करते आणि मधुमेह विरोधी गुणधर्म प्रदर्शित करण्यास देखील मदत करते. गाढवाच्या दुधात कमी जंतू असतात ज्यामुळे ते जास्त काळ खराब होण्यापासून वाचते.
संपर्क :-
धीरेन सोलंकी
मानुंद, जि. पाटण, गुजरात
मो. नं. :- 8487981299
