मुंबई (प्रतिनिधी) : कृषी उत्पादने व कृषी आधारित वस्तूंचे भौगोलिक मानांकन होऊन त्यावर पेटंट मिळविले तर शेतकर्यांना त्यांच्या उत्पादनाच्या दुप्पट ते चौपट दाम मिळेल. त्यासाठी शेतकर्यांनी आधुनिक शेतीचे नवनवीन ज्ञान देश विदेशातून मिळविले पाहिजे. आधुनिक शेतीचे हे ज्ञान शेतकर्यांपर्यंत पोहोचविण्यासाठी कृषी विद्यापीठांनी देखील पुढाकार घ्यावा, असे आवाहन राज्यपाल भगतसिंह कोश्यारी यांनी केले.
वंदे भारत विकास फाउंडेशन व द राईज इंडिया यांनी शेतकर्यांच्या शिक्षण, प्रशिक्षण व कौशल्य वर्धनासाठी विकसित केलेल्या वंदे किसान अॅपचे लोकार्पण राज्यपाल कोश्यारी यांच्या हस्ते नुकतेच राजभवनात झाले. यावेळी ते बोलत होते. यावेळी आमदार आशिष शेलार, द राईज इंडिया व वंदे भारत विकास फाउंडेशनचे संस्थापक प्रसाद कुलकर्णी, व्यवस्थापकीय भागीदार अनिरुद्ध हजारे, प्रगतिशील शेतकरी पद्मश्री राहीबाई पोपेरे, डॉ. बाळासाहेब सावंत, कोकण कृषी विद्यापीठाचे कुलगुरू डॉ. संजय सावंत उपस्थित होते.
सेंद्रीय शेतीची कास धरावी
रासायनिक शेतीचे दुष्परिणाम पाहून शेतकर्यांनी पुन:श्च सेंद्रिय शेतीची कास धरावी असे सांगून राज्यपाल कोश्यारी यांनी सांगितले, की शेतीचे आधुनिक ज्ञान व तंत्रज्ञान शेतकर्यांपर्यंत पोहोचविण्यासाठी आपण सर्व कृषी विद्यापीठांच्या कुलगुरूंना सूचना करू. देश अन्नधान्याच्या बाबतीत आयातदार असल्याचे आपण पहिले आहे. त्याकाळात देशात अमेरिकेकडून निकृष्ट गहू येत होता. भारताने गेल्या 40- 50 वर्षांत कृषी क्षेत्रात मोठी प्रगती केल्याने कोरोनाच्या संकट काळात अर्थव्यवस्था मजबूत राहिली. अन्नधान्याच्या बाबतीत देश आज स्वयंपूर्ण आहे. आज गावागावातील शेतकर्यांना नवीनतम ज्ञान हवे आहे. मोबाईल अॅप व डिजीटल माध्यमातून ते शेतकर्यांपर्यंत पोेचविण्यासाठी मोबाईल कनेक्टिव्हीटी देखील चांगली असली पाहिज. वंदे किसान डिजीटल व्यासपीठ हा अतिशय स्तुत्य उपक्रम असून त्यातून हे अॅप देशभर प्रचलित होईल असा विश्वासही राज्यपालांनी व्यक्त केला.
देशी वाणाची बीज बँक असावी: पद्मश्री राहीबाई पोपेरे
सध्या हायब्रीड बियाणे तसेच रासायनिक शेतीमुळे अनेक आजार वाढले आहेत. त्यामुळे आपल्या भावी पिढ्यांच्या आरोग्य सुरक्षेसाठी शेतकर्यांनी सेंद्रिय शेती करावी तसेच प्रत्येक गावात देशी वाणाची बीज बँक असावी, असे मत बीज बँकेच्या पुरस्कर्त्या पद्मश्री राहीबाई पोपेरे यांनी व्यक्त केले. यावेळी राज्यपालांच्या हस्ते गुणवंत शेतकर्यांसह काही अधिकार्यांना गौरविण्यात करण्यात आले.
