मुंबई : राज्यातील शेतकऱ्यांना कांदा चाळ उभारणीसाठी 62 कोटी 50 लाख रुपयांचा निधी मंजूर करण्यात आला आहे. राज्य शासनाने राष्ट्रीय कृषी विकास योजनेंतर्गत अर्थसाह्य स्वरूपात हा निधी एका वर्षाच्या कालावधीसाठी मंजूर केला आहे. त्यामुळे राज्यातील कांदा उत्पादक शेतकऱ्यांना दिलासा मिळाला आहे.
राज्यात कांद्यांचे उत्पादन घेणाऱ्या शेतकऱ्यांची संख्या मोठ्या प्रमाणावर आहे. कांद्याचे बाजार भाव बाजारात स्थिर असतातच असे नाही. त्यामुळे कांदा उत्पादकांना आपल्या कांद्यांना चांगला भाव मिळण्यासाठी बऱ्याचदा कांदा साठवून ठेवावा लागतो. त्यासाठी कांदाचाळीची त्यांना गरज भासत असते. राष्ट्रीय कृषी योजनेंतर्गत या प्रकल्पांतर्गत एकूण रू. 250 कोटींचा कार्यक्रम राबविण्यात येणार आहे. त्यात कांदा उत्पादक शेतकऱ्यांना अर्थसहाय्याच्या स्वरुपात 62.50 कोटी रुपयांचा निधी एका वर्षाच्या कालावधीसाठी मंजूर करण्यात आला आहे.
दोन वर्षांसाठी लाभ
कांदा चाळ उभारणी प्रकल्प सन 2021-22 व 2022-23 मध्ये राबविण्यास मान्यता देण्यात आली आहे. सदर प्रकल्पांतर्गत एकूण 250 कोटी रुपयांचा कार्यक्रम राबविण्यात येणार असून राष्ट्रीय कृषी विकास योजनेंतर्गत अर्थसहाय्याच्या स्वरूपात 125 कोटी निधी दोन वर्षांच्या कालावधीसाठी उपलब्ध करून दिला जाणार आहे. त्यानुषंगाने राज्यस्तरीय प्रकल्प मंजूरी समितीने सन 2021-22 व 2022-23 या आर्थिक वर्षासाठी 125 कोटी नियतवाटप मंजूर केलेले आहे. हा प्रकल्प सन 2022-23 मध्ये राबविण्यासाठी उर्वरित 62.50 कोटी निधीच्या कार्यक्रमास प्रशासकीय मान्यता देण्यात येत आहे. सदर प्रकल्प 50:50 या प्रमाणात राबविण्यात येणार आहे. त्यानुसार वैयक्तिक लाभार्थ्यांना एकात्मिक फलोत्पादन विकास अभियानाच्या मापदंडानुसार अनुदान उपलब्ध करून देण्यासाठी 62.50 कोटी निधी राष्ट्रीय कृषि विकास योजनेअंतर्गत उपलब्ध करून देण्यात येत आहे. याबाबतचा शासन निर्णय १४ डिसेंबर २०२१ रोजी महाराष्ट्र शासनाच्या अधिकृत वेबसाईटवर प्रकाशित करण्यात आलेला आहे.
