मुंबई – यंदाच्या नैऋत्य मान्सून हंगामाच्या दुसऱ्या सहामाहीत (ऑगस्ट-सप्टेंबर) देशभरात सरासरीपेक्षा थोडासाच कमी (94% पेक्षा कमी) पाऊस पडण्याची शक्यता भारतीय हवामान विभाग (आयएमडी)ने दीर्घकालीन महिनाभराच्या अंदाजात वर्तविली आहे. सध्या विषुववृत्तीय पॅसिफिक महासागरावर मध्यम एल-निनो परिस्थिती असून मान्सून हंगाम उत्तरार्धात ही परिस्थिती आणखी तीव्र होण्याची शक्यता असल्याचा इशाराही आयएमडीने दिला आहे. दरम्यान, ‘एल-निनो’ला ठेंगा दाखवत, जुलैमध्ये पावसाने राज्यावर जोरदार कृपा बरसविली. 90% तुटीचा अंदाज धुडकावून लावत पावसाने जून-जुलैची सरासरी ओलांडली असून 6% जास्त पाऊस नोंदवला गेला.
आयएमडी’च्या दीर्घकालीन अंदाजात ठळक मुद्दे
2026 च्या नैऋत्य मान्सून हंगामाच्या दुसऱ्या सहामाहीत (ऑगस्ट-सप्टेंबर) देशभरात सरासरीपेक्षा कमी म्हणजे दीर्घकालीन सरासरी एलपीएच्या 94% पेक्षा कमी पाऊस पडण्याची शक्यता आहे. या कालावधीत, द्वीपकल्पीय भारत, मध्य भारत, वायव्य भारताचा उत्तरेकडील भाग आणि पूर्व व ईशान्य भारताचे काही भाग वगळता देशाच्या अनेक भागांमध्ये सरासरीपेक्षा कमी पाऊस पडण्याची दाट शक्यता आहे, जिथे सामान्य ते सरासरीपेक्षा जास्त पाऊस पडण्याची शक्यता आहे.
मध्य भारतात पाऊस मेहेरबान राहणार
ऑगस्ट 2026 दरम्यान, देशभरात पर्जन्यमान सामान्यपेक्षा कमी (दीर्घकालीन सरासरीच्या 94% पेक्षा कमी) असण्याची शक्यता आहे. पूर्व द्वीपकल्पीय भारतातील अनेक भाग, वायव्य आणि मध्य भारतातील काही भाग आणि पूर्व व ईशान्य भारतातील तुरळक भाग वगळता देशाच्या अनेक भागांमध्ये सामान्यपेक्षा कमी पावसाची दाट शक्यता आहे, जिथे सामान्य ते सामान्यपेक्षा जास्त पावसाची शक्यता आहे.
या महिन्यात देशभर उष्ण वातावरण
ऑगस्ट 2026 दरम्यान, देशाच्या बहुतांश भागांमध्ये मासिक सरासरी कमाल तापमान सामान्यपेक्षा जास्त राहण्याची शक्यता आहे. तथापि, वायव्य आणि मध्य भारतातील काही भागांमध्ये, तसेच लगतच्या दक्षिण द्वीपकल्पातील काही तुरळक प्रदेशांमध्ये, या महिन्यात मासिक सरासरी कमाल तापमान सामान्य ते सामान्यपेक्षा कमी राहण्याची शक्यता आहे. ऑगस्ट 2026 दरम्यान, देशाच्या बहुतांश भागांमध्ये मासिक सरासरी किमान तापमान सामान्य ते सामान्यपेक्षा जास्त राहण्याची शक्यता आहे.
एल निनोची परिस्थिती अधिक तीव्र
सध्या विषुववृत्तीय पॅसिफिक महासागरावर मध्यम एल निनो परिस्थिती असून, मध्य आणि पूर्व विषुववृत्तीय पॅसिफिकमध्ये समुद्राच्या पृष्ठभागाच्या तापमानातील (एसएसटी) तफावत सामान्यपेक्षा जास्त आहे. नैऋत्य मान्सूनच्या उत्तरार्ध हंगामात ही परिस्थिती आणखी तीव्र होण्याची शक्यता आहे. मान्सून मिशन कपल्ड फोरकास्ट सिस्टीम (एमएमसीएफएस)च्या अंदाजानुसार, नैऋत्य मान्सूनच्या उर्वरित काळात एल निनोची परिस्थिती अधिक तीव्र होत राहील.
अनुकूल आयओडी परिस्थिती
सध्या, हिंद महासागरावर तटस्थ इंडियन ओशन डायपोल (आयओडी) परिस्थिती आहे. मान्सून मिशन कपल्ड फोरकास्ट सिस्टीम (एमएमसीएफएस)च्या अंदाजानुसार, उर्वरित मान्सूनच्या काळात ही तटस्थ आयओडी परिस्थिती कायम राहण्याची आहे. तथापि, काही आंतरराष्ट्रीय हवामान केंद्रांच्या अंदाजानुसार, 2026 मध्ये, मान्सून उत्तरार्धात अनुकूल आयओडी परिस्थिती निर्माण होण्याची शक्यता आहे.
तुम्हाला हे वाचायला नक्की आवडेल
