राज्यात लवकरच खासगी खाजगी पशुवैद्यकीय महाविद्यालये सुरू केली जाणार आहेत. पशु व मत्स्य विज्ञान विद्यापीठांतर्गत खासगी पशुवैद्यकीय महाविद्यालय स्थापन करण्याबाबतची नियमावली तयार करण्यात येत असल्याची माहिती पशुसंवर्धन व दुग्धव्यवसाय मंत्री राधाकृष्ण विखे पाटील यांनी दिली. मंत्रालयातील विद्यापीठाच्या आढावा बैठकीत त्यांनी हे सांगितले.
खासगी पशुवैद्यकीय महाविद्यालय स्थापन करण्यासाठी नियमावलीच्या प्रारुपास पुढील विद्यापीठ स्तरीय विद्या परिषद समिती आणि कार्यकारी परिषदेसमोर ठेवले जाईल. त्याची मान्यता प्राप्त झाल्यानंतर व त्यानुसार हा प्रस्ताव शासन मान्यतेसाठी सादर करण्यात येईल, असेही विखे पाटील यांनी स्पष्ट केले. पशु व मत्स्य विज्ञान विद्यापीठातील समस्या प्राधान्याने सोडविणार असल्याचेही त्यांनी या बैठकीत सांगितले.
यावेळी विखे पाटील म्हणाले, “विद्यापीठात सहयोगी प्राध्यापक पदे भरतांना नियमाप्रमाणे कार्यवाही करावी. विद्यापीठ व अंतर्गत महाविद्यालयातील रिक्त पदे मंजूर आकृतीबंधानुसार भरण्याची कार्यवाही सुरू ठेवावी.”
बैठकीत विविध महाविद्यालयातील प्रक्षेत्र विकसित करणे आणि मुला-मुलींसाठी नवीन वसतीगृह बांधकाम व दुरुस्तीसाठी निधी उपलब्ध करून देणे तसेच विद्यापीठ व अंतर्गत महाविद्यालयाच्या इमारतीच्या दुरुस्ती व देखभालीकरिता निधी मिळण्याबाबतही चर्चा करण्यात आली. पशुवैद्यकीय महाविद्यालयाच्या इतर प्रश्नांबाबतही यावेळी सकारात्मक चर्चा करण्यात आली.
बैठकीस पशुसंवर्धन व दुग्धव्यवसाय विभागाचे सचिव तुकाराम मुंडे, विद्यापीठाचे कुलगुरू डॉ. नितीन पाटील, विद्यापीठाच्या कार्यकारी परिषदेचे सदस्य भगवान सटाले यांच्यासह विभागाचे अधिकारी व विद्यापीठाचे अधिकारी उपस्थित होते.
(Team DGIPR )
