प्राचीन काळापासून भारतीय संस्कृतीत गायीचे महत्व सर्वश्रुत आहे. गोमूत्र आणि शेणाचे फायदेही आपल्याला माहितीच आहेत. पण, आता चक्क गायीच्या शेणापासून अँटी रेडिएशन चिप तयार करण्यात आली असून मोबाईलसाठी ही चिप वापरता येणार आहे. हे आजारांविरोधात प्रभावी अस्र असल्याचा दावा कामधेनू आयोगाने केला आहे. राष्ट्रीय कामधेनु आयोगाने सोमवारी (दि.१२ ऑक्टोबर) गायीच्या शेणापासून बनवलेली चिप सादर केली आहे. या चिपमुळे मोबाइल हँडसेटचे रिडिएशन बऱ्याच प्रमाणात कमी होत असल्याचे आयोगाने म्हटले आहे. याबाबत आयोगाचे अध्यक्ष वल्लभभाई कथीरिया यांनी दिल्ली येथील पत्रकार परिषदेत माहिती दिली.
गौसत्व कवच
आपल्याला जर रिडिएशन पासून होणाऱ्या विविध आजारांपासून वाचायचे असल्यास येणाऱ्या काळात ही चिप उपयोगी पडणार असल्याचेही ते म्हणाले. या बरोबरच गायीच्या शेणापासून तयार करण्यात आलेल्या इतर वस्तू देखील प्रसिद्ध करण्यात आल्या. या दिवाळीत चीनी उत्पादनांवर बहिष्कार टाकणे आणि गायीच्या शेणापासून तयार करण्यात आलेल्या उत्पादनांचा उपयोग वाढावा यासाठी राष्ट्रीय कामधेनु आयोगाने कामधेनु दीपावली अभियान सुरू करण्याची घोषणा केली असून आज पत्रकार परिषदेत शेणाचे दिवे, शुभ-लाभ आणि शेणाचे चिप देखील प्रदर्शित केले गेले. गौसत्व कवच असे या अँटी रेडिएशन चिपचे नाव असून राजकोटमधील श्रीजी गौशाळेत ही चिप तयार करण्यात आलेली आहे.
आयोगाने याआधी सुरु केलेल्या गोमय गणेश अभियानाच्या सफलतेमुळे उत्साहित होऊन आयोगाने दीपावलीच्या काळात गोमय दीपक लोकांमध्ये लोकप्रिय बनवण्यासाठी हे अभियान चालवण्याचा संकल्प केला असून, या अभियानांतर्गत आयोग दीपोत्सवादरम्यान शेण आणि पंचगव्याच्या बहुआयामी उपयोग करण्यास प्रोत्साहन देणार आहे. दीपपर्वासाठी शेणाद्वारे तयार करण्यात आलेले दिवे, मेणबत्त्या, धूप, अगरबत्ती, शुभ-लाभ, स्वास्तिक, समया, हार्डबोर्ड, हवनाची साधने, गणपती आणि लक्ष्मीच्या प्रतिमांच्या निर्मितीचे काम सुरू झाले असल्याचेही त्यांनी सांगितले. आयोगाचे हे प्रयत्न गोशाळांना स्वावलंबी बनवण्याच्या दृष्टीने एक मैलाचा दगड सिद्ध होतील याचबरोबर गोपालन विषयी जनजागृती होऊन शेतकऱ्यांच्या उत्पन्नात देखील याद्वारे काही प्रमाणात का होईना भर पडणार आहे. आयोगाचा हा प्रयत्न म्हणजे पंतप्रधान नरेंद्र मोदी यांची संकल्पना आणि स्वदेशी आंदोलनाला प्रोत्साहित करत चीन निर्मित दिव्यांवर बहिष्कार घालण्याची एक प्रेरणा ठरेल, अशी आशा आयोगाने व्यक्त केली आहे.
