प्रतिनिधी/पुणे
मागील २४ तासात राज्यातील अनेक भागात जोरदार पाऊस झाला आहे. या संततधार पावसामुळे राज्यातील अनेक भागातील जलप्रकल्प ओसंडून वाहत आहेत. दरम्यान हवामान खात्याच्या नवीन अंदाजाने पुन्हा शेतकऱ्यांच्या चिंतेत भर पडली आहे. आज (दि.२१ सप्टेंबर) मराठावाड्यातील औरंगाबाद, जालना, हिंगोली, नांदेड जिल्ह्यात कडकडाट वादळी पाऊस पडेल. तर कोकणातील सिंधुदुर्ग आणि मध्य महाराष्ट्रातील कोल्हापुरात देखील पाऊस होण्याची शक्यता आहे. दरम्यान उद्या रत्नागिरी, सिंधुदुर्ग जिल्ह्यात काही ठिकाणी अतिवृष्टी होण्याचा इशारा हवामान विभागाने वर्तविला आहे. कोकणातील ठाणे, पालघर, मुंबई, रायगड, रत्नागिरी, जिल्ह्यातील काही भागात जोरदार पाऊस पडणार आहे. बुधवारपासून या भागात पावसाचे प्रमाण कमी होणार आहे. बुधवार (दि.२३) पासून पाऊस काही भागात थोडी उसंत घेणार .
मध्य महाराष्ट्रात पुणे, नगर, कोल्हापूर आणि सातारा जिल्ह्यातील काही भागातही मुसळधार पाऊस होईल. सोलापूर आणि सांगली जिल्ह्यात पावसाची उघडीप राहणार असून खानदेशातील धुळे, जळगाव, नंदुरबार जिल्ह्यात मेघगर्जनेसह पाऊस पडेल. दम्यान आज मराठवाड्यात विजांच्या कडकडाट आणि वादळी वाऱ्यासह पाऊस पडेल. लातूर, बीड जिल्ह्यांत काही प्रमाणात पाऊस होईल. तर मंगळवारी औरंगाबाद वगळता इतर भागात ढगाळ हवामान राहिल. पश्चिम विदर्भातील अमरावती, बुलडाणा, अकोला, वाशीम, यवतमाळ जिल्ह्यात हलका ते मध्यम पाऊस पडेल.
कसे असेल 21 ते 27 सप्टेंबर पर्यंत हवामान
मान्सून 2020 हा महाराष्ट्राला जास्त अनुकूल आहे. बर्‍याच भागात ५ दिवसांपासून व्यापक पाऊस सुरू आहे. या आठवड्यातही विदर्भ ते मराठवाडा, मध्य महाराष्ट्र आणि कोकण, गोवा प्रदेशात 21 ते 23 सप्टेंबर दरम्यान मुसळधार पाऊस पडण्याची शक्यता आहे. यातही 21 आणि 22 रोजी दक्षिण कोकण आणि दक्षिण मध्य महाराष्ट्रात बर्‍याच ठिकाणी मुसळधार पाऊस पडण्याची शक्यता आहे. रत्नागिरी, सिंधुदुर्ग, कोल्हापूर, सांगली, सातारा, उस्मानाबाद, लातूर, पुणे, रायगड याचा प्रामुख्याने परिणाम होऊ शकतो.
23 आणि 24 रोजी संपूर्ण राज्यात पावसाची तीव्रता कमी होईल. तथापि, या काळात मराठवाड्यातून कोकण गोव्यापर्यंत काही ठिकाणी हलका ते मध्यम पाऊस पडण्याची शक्यता आहे. २५ आणि २६ सप्टेंबर रोजी दक्षिण महाराष्ट्रातील काही जिल्ह्यांत हलका ते मध्यम पाऊस पडेल. परंतु यावेळी मर्यादित भागात पाऊस पडेल. त्यानंतर महाराष्ट्रात मान्सूनचा जोर कमी होईल.
2020 हंगामात आतापर्यंत महाराष्ट्रातील विविध भागात सामान्यपेक्षा जास्त पाऊस झाला आहे. कोकणात गोव्यात 25% जास्त पाऊस झाला, मध्य महाराष्ट्रात नेहमीपेक्षा 32% जास्त, मराठवाड्यात 28% जास्त पाऊस झाला. तर विदर्भात सामान्यपेक्षा 11% कमी पाऊस झाला आहे.
शेतकऱ्यांनी काळजी घ्यावी
नदी नाल्यांना पूर आल्याने पिकांसह शेतजमिन खरडून गेल्या आहेत. सोयबीनला अति पावसाचा फटका बसू शकतो, तर अनेक ठिकाणी कपाशी पीक पाण्याखाली गेले. द्राक्षबागांमध्ये पाणी साचून काही ठिकाणी ऊस आडवा झाला. मराठावाड्यातील औरंगाबाद जालना, परभणी व हिंगोली या चार जिल्ह्यात काही भागात अतिवृष्टी झाली. मुसळधार पावसामुळे करपरा, दुधना , इंद्रायणी, पूर्णा, नद्यांना पूर आला. जळगाव जिल्ह्यातील गिरणा प्रकल्प प्रथमच सलग दुसऱ्या वर्षी १००% भरला आहे. नाशिक जिल्ह्यात अतिवृष्टी झाल्याने सोयाबीन, बाजरी, मका, या पिकांना फटका बसला आहे. पावसामुळे अनेक ठिकाणी शेताचे बांध ओलांडून पाणी वाहिले. शेतकऱ्यांनी शेतात साचलेले पाणी बाहेर काढून वापसा तयार करावा जेणेकरून उभ्या पिकांचे नुकसान होणार नाही. काढणीयोग्य शेतमाल झाकून काढणीच्या योग्य वेळेची प्रतीक्षा करावी. पशुधन सुरक्षित ठिकाणी हलवावे. अश्या सूचना प्रशासनाने दिल्या आहेत.
