नवी दिल्ली : पंतप्रधान नरेंद्र मोदी यांच्या अध्यक्षतेखाली झालेल्या बैठकीत केंद्रीय आर्थिक व्यवहार समितीने इथेनॉलच्या किमतीत 80 पैशांपासून 2 रुपये 55 पैसे प्रती लिटरने वाढवली आहे. ज्याचा लाभ ऊस उत्पादक शेतकर्‍यांना होणार आहे. दरम्यान, इथेनॉलच्या नवीन किमती 1 डिसेंबर 2021 पासून लागू होतील, असे केंद्रीय मंत्री अनुराग सिंह ठाकूर यांनी सांगितले.
केंद्रीय मंत्री अनुराग ठाकूर यांनी सांगितले, की बी श्रेणीच्या सेरामधून मिळणार्‍या इथेनॉलची किंमत सध्या 57.61 रुपये प्रती लिटरवरून 2.55 रुपयांनी वाढवून 59.08 रुपये प्रती लिटर करण्यात आली आहे. तर सी श्रेणीच्या सेरामधील इथेनॉलची किंमत 44.54 रुपयांवरून 2.12 रुपयांनी वाढवून 46.66 रुपये प्रती लिटर केली आहे. यापूर्वी ऑक्टोबर 2020 मध्ये केंद्र सरकारने उसापासून काढलेल्या इथेनॉलच्या किमतीत प्रती लिटर 3.34 रुपयांनी वाढ केली होती.
12 राज्यांतील शेतकर्‍यांना फायदा
इथेनॉलच्या किमती वाढल्यामुळे त्याचा थेट फायदा देशातील 12 राज्यांमधील शेतकर्‍यांना मिळणार आहे असे मंत्री ठाकूर यांनी सांगितले. ते म्हणाले की, उसाच्या कडब्यापासून बनवलेल्या इथेनॉलची किंमत डिसेंबर 2020 पासून सुरू होणार्‍या पुरवठा वर्षात 59.48 रुपये प्रती लिटरवरून आता 62.65 रुपये प्रती लिटर करण्यात आली आहे. मोदी सरकारने कच्च्या तेलाची आयात कमी करण्याची योजना आखली आहे. या अंतर्गत वाहनाच्या इंधनात इथेनॉल मिश्रणाचा प्रचार केला जात आहे. या अंतर्गत सरकारने 10 टक्के इथेनॉलच्या मिश्रणाला मान्यता दिलीय.
20 टक्के इथेनॉल मिश्रणावर काम सुरू
इथेनॉलच्या किमती वाढवून ऊस उत्पादक शेतकर्‍यांना त्यांच्या पिकांना चांगला भाव मिळू शकेल, असे केंद्र सरकारचे मत आहे. सरकार 10 टक्के इथेनॉल मिश्रित पेट्रोल विकणार्‍या भागात इथेनॉल ब्लेंडिंग पेट्रोल प्रोग्राम लागू करीत आहे. सरकारने अंदमान- निकोबार व लक्षद्विप वगळता सर्व राज्यात 1 एप्रिल 2019 पासून देशभरात हा कार्यक्रम लागू केला आहे. जून 2021 पासून 20 टक्के इथेनॉल मिश्रणाच्या योजनेवर सरकार काम करीत असून ज्याची अंमलबजावणी एप्रिल 2025 पासून करण्याचे लक्ष्य आहे. तेल विपणन कंपन्या सरकारने ठरवलेल्या किमतीवर इथेनॉल खरेदी करतात. इथेनॉलच्या किमती वाढल्याने इथेनॉल निर्मितीला बळ मिळेल, असेही मंत्री श्री. ठाकूर यांनी सांगितले.
दरम्यान, केंद्राने इथेनॉल दरवाढीचा अपेक्षित निर्णय घेतला असल्याचे मत राष्ट्रीय सहकारी साखर कारखाना महासंघाचे व्यवस्थापकीय संचालक प्रकाश नाईकनवरे यांनी व्यक्त केले आहे. जागतिक बाजारात इंधनाच्या दरवाढीवर इथेनॉलच्या किमती अन्य देश ठरवत असतात. केंद्राने मात्र उसाची एफआरपी निगडित धरून इथेनॉलच्या किमतीतही वाढ केली. याचा अनुकूल परिणाम इथेनॉल प्रकल्पांची क्षमता, निर्मिती व वापर वाढण्यावर होऊ शकतो. याचा फायदा साखर उद्योगासाठी निश्चित होईल असेही त्यांनी सांगितले.
