उत्तर प्रदेशातील शेतकऱ्यांना वीज बिलाच्या थकबाकीत 80 टक्के सूट देण्यात आली आहे. याशिवाय, शेतीच्या सिंचनासाठी 10 तास वीज उपलब्ध करून दिली जाणार आहे. ऊर्जामंत्री ए.के. शर्मा यांनी ही माहिती दिली.
ऊर्जामंत्र्यांनी शक्ती भवन येथे ओटीएस, आरडीएसएस आणि व्यवसाय योजनेचा आढावा घेतला. या योजनांचा लाभ जनतेला मिळावा, यासाठी कामांना गती देण्याच्या सूचना त्यांनी दिल्या.
शेतकऱ्यांना मुबलक वीज पुरवठा
उत्तर प्रदेशातील शेतकऱ्यांसाठी चांगली बातमी योगी आदित्यनाथ सरकारने दिली आहे. राज्यातील शेतकऱ्यांना त्यांच्या पिकांच्या सिंचनासाठी वीज पुरवठ्यात कोणतीही कमतरता भासू नये, अशा सूचना सरकारने दिल्या आहेत. त्यासाठी विहित वेळापत्रकानुसार सिंचनासाठी 10 तास वीजपुरवठा देणे आवश्यक आहे. शेतकर्यांची वेळेनुसार वीज पुरवठ्याची विशेष मागणी असते, त्याचीही काळजी घेतली जाणार आहे. शेतकऱ्यांना नवीन कनेक्शन देताना आणि वीज पुरवठा करताना कोणतीही हलगर्जीपणा करू नये, अशी ताकीद वीज मंडळ अधिकाऱ्यांना देण्यात आली आहे. तडजोडीच्या वन टाईम सेटलमेंट म्हणजे ओटीएसच्या तिसऱ्या टप्प्यात 1 किलोवॅटपर्यंतचे छोटे घरगुती ग्राहक आणि शेतकर्यांना थकबाकीवरील अधिभारामध्ये 80 टक्के सूट दिली जाणार आहे.
थकबाकीदारांचा तडजोड योजनेला प्रतिसाद
ऊर्जामंत्री ए.के. शर्मा म्हणाले की, लोकांचा ओटीएसकडे वाढता कल आहे, याच्या लाभापासून कोणीही वंचित राहू नये यासाठी अजून प्रयत्नांची गरज आहे. ही आतापर्यंतची सर्वात जास्त काळ चालणारी OTS योजना आहे. 31 डिसेंबर 2023 नंतर ज्या ग्राहकांची थकबाकी शिल्लक आहे किंवा ज्यांची वीज चोरी प्रकरणे निकाली निघू शकत नाहीत, अशा ग्राहकांवर कारवाई केली जाईल. बड्या थकबाकीदारांकडून वसुलीसाठी मुख्यालय, डिस्कॉम, प्रादेशिक व जिल्हास्तरीय कार्यालयातूनही प्रयत्न करावेत, असे निर्देश मंत्र्यांनी दिले. विशेषत: निगरगट्ट थकबाकीदारांवर विशेष लक्ष द्यावे लागेल.
34 लाख शेतकरी ग्राहकांनी घेतला लाभ
ओटीएसच्या दोन टप्प्यांत पूर्वांचलमधील 9 लाख 30 हजार ग्राहक, मध्यांचलमध्ये 9.25 लाख, दक्षिणांचलमध्ये 7.13 लाख, पश्चिमांचलमध्ये 7.12 लाख आणि केस्कोमधील 20 हजार ग्राहकांनी ओटीएसमध्ये नोंदणी केली आणि अधिभार सवलतीचा लाभ घेतला. तसेच वीजचोरीच्या प्रकरणात पूर्वांचलमध्ये 18 हजार, मध्यांचलमध्ये 11 हजार, दक्षिणांचलमध्ये 18 हजार, पश्चिमांचलमध्ये 21 हजार आणि केसकोमध्ये 1350 जणांनी ओटीएसचा लाभ घेऊन आपली प्रकरणे संपवली.
OTS अंतर्गत हप्त्यांमध्ये भरण्याची सुविधा
ओटीएसच्या तिसर्या टप्प्यातही 1 किलोवॅटपर्यंतचे छोटे घरगुती ग्राहक आणि शेतकर्यांना थकबाकीवरील अधिभारात 80 टक्के सूट मिळत आहे. तसेच वीजचोरीच्या प्रकरणांमध्ये तिसऱ्या टप्प्यात 50 टक्के सूट देण्यात येत आहे. सर्व ग्राहकांना OTS अंतर्गत हप्ते भरण्याची सुविधा देखील देण्यात आली आहे. योजनेंतर्गत तिसऱ्या टप्प्यात 1 किलोवॅटपेक्षा जास्त लोड असलेल्या घरगुती ग्राहकांना 70 टक्के सवलत, 3 किलोवॅटपर्यंतचे लोड असलेल्या व्यावसायिक ग्राहकांना 60 टक्के सवलत, 3 किलोवॅटपेक्षा जास्त लोड असलेल्या व्यावसायिक ग्राहकांना 40 टक्के सवलत दिली जाणार आहे. किलोवॅट, खाजगी संस्था आणि औद्योगिक आस्थापनांना 30 टक्के सवलत मिळत आहे.
तुम्हाला हेही वाचायला नक्की आवडेल 👇
