मुंबई (मंत्रालय प्रतिनिधी) – शेतकऱ्यांनी पाऊस आल्याशिवाय पेरणीची घाई करू नये, असे आवाहन राज्याच्या कृषी विभागाचे नव्याने पुन्हा केले आहे. येत्या काही दिवसांत पावसाचे आगमन होईल, असा अंदाज हवामान विभागाने जाहीर केला आहे. त्यामुळे शेतकऱ्यांनी धीर धरावा, असे सरकारने म्हटले आहे. लांबलेल्या पावसामुळे राज्यातील वरिष्ठ कृषी अधिकारी, सर्व कृषी विद्यापीठांचे कुलगुरु यांची बैठक कृषिमंत्र्यांनी घेतली. त्यावेळी पेरणीबाबत घाई न करण्याचे आवाहन करण्यात आले.
लांबलेल्या पावसामुळे या खरीप हंगामात कृषी विभागाने शेतकऱ्यांना पीक पेरणी नियोजनाच्या अनुषंगाने उपयुक्त सल्ला द्यावा आणि मार्गदर्शन करावे, अशा सूचना करण्यात आल्या. याशिवाय, शेतकऱ्यांना खते, बियाणे आणि किटकनाशके योग्य दरात आणि वेळेवर मिळतील, यासाठीची कार्यवाही करण्याचे कृषी विभागाला सांगण्यात आले. तसेच, खते, बियाणे, किटकनाशके विक्रीत काळाबाजार करणारे आणि बोगस बियाणे विक्री करणाऱ्यांवर कडक कारवाई करा, असे निर्देश कृषिमंत्री अब्दुल सत्तार यांनी या बैठकीत दिले.
राज्यातील वरिष्ठ कृषी अधिकारी, राज्यातील सर्व विद्यापीठांचे कुलगुरु यांची पाऊस आणि पेरणीच्या अनुषंगाने शेतकऱ्यांसाठी करावयाच्या कार्यवाहीबाबत व्हिडिओ कॉन्फरन्सद्वारे आढावा बैठक कृषिमंत्री सत्तार यांनी घेतली. शेतकऱ्यांना पेरणीपूर्व योग्य पीक पाणी सल्ला देणे गरजेचे आहे. हवामान विभागातील तज्ज्ञांच्या सल्ल्याने कृषी विभागाने यासंदर्भातील सूचना, मार्गदर्शन शेतकऱ्यांना वेळोवेळी करणे आवश्यक आहे. त्याचबरोबर, वरिष्ठ कृषी अधिकाऱ्यांपासून अगदी गावपातळीवरील विभागाच्या अधिकारी-कर्मचारी यांनी थेट शेतकऱ्यांशी संवाद साधून त्यांना पीक पेरणी संदर्भातील माहिती, पावसाला विलंब झाल्यास घ्यावयाची काळजी, विशिष्ट हवामान पद्धतीत कोणते पीक घ्यावे, याबाबतचे मार्गदर्शन करणे आवश्यक आहे. शेतकरी हा राज्याचा महत्वाचा घटक आहे. शेतकरी संकटात येणार नाही, यासाठी आतापासूनच योग्य ती पूर्वतयारी आणि नियोजन करण्याच्या सूचना यावेळी देण्यात आल्या.
टोळंबीचे तेल…! ऐकले आहे का..?… पहा हा खास व्हिडीओ
https://youtu.be/fyG9PJEeu1o
जून अखेर पावसाची शक्यता, मात्र…
सध्या राज्याच्या काही भागात पेरणी झाली आहे. जून महिना अखेरीस पाऊस येईल, असा हवामान विभागाचा अंदाज आहे. त्यामुळे पाऊस आल्याशिवाय पेरणीची घाई शेतकऱ्यांनी करु नये, यासाठी कृषि विभाग आणि कृषी विद्यापीठांच्या शास्त्रज्ञांनी शेतकऱ्यांपर्यंत माहिती पोहोचवावी, अशा सूचनाही देण्यात आल्या. सध्या शेतकरी वर्ग पेरणीसाठी बियाणे, खते, कीटकनाशके खरेदी करण्यात व्यस्त आहे. अशावेळी त्यांची फसवणूक होणार नाही, याची काळजी कृषी विभागाने घ्यावी. जिल्हास्तरावरील सनियंत्रण समित्यांनी याबाबत वेळोवेळी आढावा घ्यावा. चुकीचे काम करुन शेतकऱ्यांची फसवणूक करणाऱ्यांवर आणि त्यांना पाठिशी घालणाऱ्यांवर कडक कार्यवाही करावी, असे निर्देश कृषीमंत्री सत्तार यांनी दिले.
बियाणे, खते कायदा कठोर करण्याचा विचार सुरू
बोगस बियाणे, खते आणि कीटकनाशके विक्री करणाऱ्यांवर कडक कार्यवाही संदर्भात राज्यासाठी नवीन कायदा करण्याचा विचार सुरु असल्याचे सत्तार यांनी सांगितले. देशात इतर राज्यांनी असा कायदा केला असेल तर त्याचाही निश्चितपणे अभ्यास करुन आपल्या राज्याचा कायदा अधिक कडक असेल, असे त्यांनी सांगितले. शेतकऱ्यांची फसवणूक करणाऱ्या कंपन्या आणि त्यांचे धागेदोरे शोधून संबंधितांवर कडक कार्यवाहीच्या सूचना यावेळी कृषी विभागाला देण्यात आल्या.
कृषी विभागाचे अतिरिक्त मुख्य सचिव अनुपकुमार, कृषी आयुक्त सुनील चव्हाण हेही या बैठकीस उपस्थित होते.
